Në një operacion kundër trafikut të drogës, karabinierët në Treviso arrestuan tre shtetas shqiptarë të dyshuar për përfshirje në shpërndarjen e kokainës. Operacioni, i cili u zhvillua të hënën mbrëma çoi në ndalimin e njërit prej të dyshuarve në Bolonja dhe zbulimin e një baze droge në shtëpinë e tij në Preganziol, “Via Vasco de Gama”.
Gjatë bastisjes, dy shqiptarë të tjerë u kapën në befasi brenda shtëpisë ndërsa përpiqeshin të fshinin provat. Njëri prej tyre rezultoi të kishte precedentë të mëparshëm për trafik droge.
Policia sekuestroi mbi 20 mijë euro të fshehura në një çantë, rreth 350 gram kokainë të pastër të fshehur në një automjet pranë shtëpisë, dhe mjete të tjera të dyshuara për trafik droge. Të dy të dyshuarit u dërguan në burgun e Trevisos, ndërsa automjeti, paratë dhe droga u sekuestruan për hetime të mëtejshme.
