Barcelona rrezikon të humbasë një nga lojtarët më të rëndësishëm të skuadrës. Raphinha ka përfunduar në shënjestrën e dy klubeve të mëdha nga Arabia Saudite, që janë gati të bëjnë një ofertë shumë të fuqishme për brazilianin.
Sipas Mundo Deportivo, Al Hilal dhe Al Nassr duan të përfitojnë nga situata financiare e Barcelonës dhe janë të gatshme të ofrojnë rreth 80 milionë euro për kartonin e 29-vjeçarit.
Jo vetëm kaq, pasi klubet saudite i premtojnë Raphinha një pagë katër herë më të lartë se ajo që përfiton aktualisht te Barcelona, duke e kthyer në një nga futbollistët më të paguar në botë.
Për momentin, braziliani nuk ka dhënë ende një përgjigje përfundimtare, pasi është nën kontratë me katalanasit deri në vitin 2028. Megjithatë, pas Kupës së Botës, palët mund të rikthehen sërish në negociata.
Barcelona e vlerëson Raphinha si një nga lojtarët kryesorë të skuadrës, por një ofertë e tillë mund ta vendosë klubin para një vendimi të vështirë.
