Ish-presidenti amerikan Barack Obama ka dalë publikisht me kritika të forta ndaj administratës së Donald Trump, duke sinjalizuar përfundimin e asaj që dikur dukej si një “bromancë” politike mes tyre.
Në një fjalim të mbajtur në Hamilton College të enjten, Obama u shpreh i shqetësuar për mënyrën se si Trump po ndërhyn në lirinë e mediave, të drejtën e fjalës në universitete dhe përpjekjet për të ndëshkuar kundërshtarët politikë. “Po sillet si një diktator i dështuar, duke u munduar të ndëshkojë armiqtë e vet. Imagjinoni sikur të kisha bërë unë një gjë të tillë,” tha ai, duke theksuar se sjellje të tilla nuk do të ishin toleruar nga askush nëse do t’i kishte bërë ai ose ndonjë prej paraardhësve të tij.
Obama kritikoi gjithashtu vendimin e Trump për të vendosur një tarifë prej 10% mbi produktet britanike, që ka rezultuar në një rënie të ndjeshme të bursës britanike – gati 175 miliardë paund të zhdukur në vetëm një javë. Ai paralajmëroi se kjo politikë nuk është e mirë për Amerikën dhe mund të ketë pasoja afatgjata ekonomike.
Këto komente vijnë vetëm disa muaj pas një momenti të rrallë miqësie publike mes Trump dhe Obamës në funeralin e Jimmy Carter, ku u panë duke qeshur së bashku – një moment që shumë e interpretuan si shenjë afrimi mes dy ish-rivalëve. Por mesa duket, marrëdhëniet mes tyre janë më të tensionuara se kurrë.
