Salmonela është një bakter që mund të shkaktojë infeksione serioze në trup, si diarre, të vjella, temperaturë dhe dhimbje barku, nëse nuk trajtohet siç duhet.
Në Shqipëri, janë identifikuar 2.6 tonë mish pule të kontaminuara me salmonelë, duke rrezikuar shëndetin e qytetarëve. Ekspertët rekomandojnë kujdes të shtuar në gatimin e mishit për të shmangur infeksionet.
“Një pjesë e rasteve mund të përfshijnë simptoma të tilla si gjak në feçe, temperaturë, dhimbje barku, diarre, të vjella dhe deri në dehidrim. Kur nuk kemi temperaturë, simptomat mund të korrigjohen duke pirë lëngje. Nëse gjendja vazhdon, fëmijët dhe të rriturit duhet të shkojnë te mjeku i familjes për një vizitë më të detajuar. Problemet e shkaktuara nga salmonela zakonisht shfaqen brenda 6-72 orëve pas konsumimit të ushqimeve të kontaminuara. Nëse simptomat përkeqësohen ose nuk kalojnë brenda disa ditësh, është e rëndësishme të kërkoni ndihmë mjekësore, sidomos në rastet e dehidratimit të rëndë, gjakderdhjes në feçe ose temperaturës së lartë që zgjat shumë. Për të zbuluar nëse jeni helmuar me salmonelë, mjekët zakonisht kryejnë një analizë koprokulture”, thotë nutricionistja Albana Daka në një intervistë për Euronewsalbania.
Personat më të rrezikuar janë fëmijët, të moshuarit dhe ata me sistem imunitar të dobët. Mjekët sugjerojnë gatim të plotë të produkteve të mishit për të eliminuar bakteret.
