Bashkëpunëtori i drejtësisë, Nuredin Dumani tronditi sot me dëshminë që bëri në Gjykatën e Posaçme kundër Krimit të Organizuar dhe Korrupsionit. Gjatë kësaj seance, Dumani ka zbuluar se si arriti të lirohej nga qelia, pasi ishte arrestuar për disa vepra të tjera penale.
Ai ka treguar se avokati Alban Bengasi ka luajtur një rol të rëndësishëm në lënien e tij të lirë, duke ndërmjetësuar dhe duke paguar një shumë prej 40 mijë eurosh për këtë qëllim. Sipas Dumanit, kjo shumë iu pagua në dorë dhëndrit të vëllait të Nasip Nacos, i cili në atë kohë mbante pozicionin e shefit të spitalit.
Dumani ka folur gjithashtu për njohjen e tij me bashkëpunëtorin tjetër të drejtësisë, Erjon Alibej, duke dhënë detaje mbi marrëdhënien dhe bashkëpunimin mes tyre. Ai ka treguar sesi ishte porositur për të vrarë disa persona me urdhër të Erjon Alibejt.
“Erjon Alibej kishte bërë një listë me dhjetë persona për t’i vrarë. Në krye të kësaj liste ishte Emiliano Ramazani dhe Talo Çela. Më tha se i dua të vrarë se kanë marrë pjesë te vrasja e vëllait në Bradashesh”, ka deklaruar Nuredin Dumani.
