Myslim Murrizi e Dash Sula, të dy ish deputetë të PD kanë filluar një debat virtual në rrjetet sociale për mënyrën sesi është menaxhuar gjatë këtyre viteve kjo forcë politike, duke vendosur një garë mes tyre se kush ka folur më shumë, e kush ka thënë më shumë të vërteta.
Me postimet e tyre nxjerrin në pah shumë prej problemeve që ka PD sot. Murrizi bën thirrje për disa elementë me emër si Alimehmeti, Qosja, Çollaku e Sula të thonë se pse nuk kanë ngritur zërin gjatë këtyre viteve për gjendjen në PD. Murrizi pretendon se është i vetmi që ka folur, brenda forumeve dhe publikisht.
“Pse nuk folët asnjë fjalë në shkurt 2025 kur po caktoheshin rregullat për ato primare leshi pa asnjë vlerë ku 23 vemje u përjashtuan nga primaret si të privilegjuar???
Pse nuk folet fare më 12 mars 2025 në Këshillin Kombëtar për listat e kandidateve për deputet të PD, për drejtuesit politik dhe njerëz pa kontribute e jashtë PD që u futën në listat e mbyllura të PD si pasojë e pazareve të pista???
Pse nuk belbezuat asnjë fjalë për koalicionin mizerabel me LSI, PDIU, që jo vetëm nuk solli asnjë votë tek PD, por i dhanë ngarkesë negative duke i vjedhur DEMOKRATEVE 5 mandate lsi me 8000 vota dhe 1 mandat PDIU me 1500 vota??
Pse heshtet në këtë kohë kur patë që në listat e PD u përfshinë individë ordiner apo llumhane që në shumicën dërrmuese kanë qenë kundërshtar të PD dhe të anatemuar nga vetë PD si element të botës së trafiqeve???
Pse nuk folët asnjë fjalë gjatë fushatës për orientimin e votës drejt 2-3 kandidatëve dhe lobimet e pamoralshme që u bënë nga ata që ju kërkoni sot me të drejtë që të japin dorëheqjet ose të hiqen nga pozicionet drejtuese që mbajnë në PD se nuk vlejnë asnjë grosh????
Nuk po zgjatem më se do më duhet një natë dimri të rendis problemet që Ju te nderuar duhet të flisnit në kohën dhe vendin e duhur që të ishit sot realist në atë që ju shoh se shprehni ne media apo fb për riorganizimin e PD”, shkruan Murrizi në një postim të gjatë.
I menjëhershëm ka qenë postimi i Dash Sulës në përgjigje të kërkesës së Murrizit.
“Nuk do ta kuptoja në asnjë moment që kolegu Myslim Murrizi më referohej edhe mua në postimin e tij në rrjetet sociale nëse nuk do të më përmendte emrin pasi unë dhe disa kolegë demokratë të tjerë kërkojmë riformatimin e Partisë Demokratike me qëllimin e vetëm: Që në 2027 dhe 2029 të mos përfundojmë në forcë e tretë, por të bëhemi alternativë qeverisëse.
Murrizit por edhe ndonjë tjetri që për shkak të dinamizmit të jetës harron me qëllim ose jo çfarë ka ndodhur në të kaluarën, dua ti kujtojë se në asnjë moment nuk kam zgjedhur të qëndroj në rresht për interesat e mija personale. Por jam betuar që kur hyra në Parlament për herë të parë se i përkas atyre që më kanë besuar.
E kam nisur shumë herët ngritjen e zërit pavarësisht se nuk ka qenë në interesin tim. Në 2007 nuk u vendosa qorrazi në rresht për një për të pranuar “ultimatumin” për të çuar në presidencë një politikan të cilin deri dy vite para e kishim kundërshtarë në zgedhje.
Kam ngritur zërin në forumet e partisë, grup parlamentarë dhe kudo duke e kundërshtuar me forcë “martesën” mazhorancë-opozitë ende pa u tharë flokët e të ndierve të Gërdecit. Këtë e dinë shumë mirë të gjithë, aq më mirë e dinë ata që janë në politik.
Në 2008, edhe z. Murrizi e di shumë mirë që nuk zgjodha të fshihesha si struci për të garantuar një mandat të radhës në Parlament, por isha ndër të paktët që dola kundër ndryshimit të Kodit Zgjedhor që ishte hapi i parë i çimentimit të dy forcave kryesore partiake dhe “mbyste” partitë e vogla (sulmi i parë ndaj demokracisë). Unë isha deputet i PD në atë kohë dhe në një farë mënyre nuk më cënononin ndryshimet, por nuk heshta reagova dhe votova kundër.
Nese doni, shikoni edhe porcesverbalet e Komisionit Hetimore për 21 Janarin e 2011 do të lexoni se sa kritik kam qenë në atë kohë edhe ndaj partisë time dhe madje kam insistiar që në komision te paraqiteshin “Armet çadër” që pretendoheshin nga partia ime. Kam kundershtuar edhe idetë e “cmendura” që flisnin per varje te liderit te opozites se kohes perpara kryeministrise. E kam fjalen per propozimin e dy zonjave “Palma de M….a”
Nuk kam qenë në Parlament, por sigurisht në mundësitë e mia kam reaguar për çmendurinë kolektive të djegies së mandateve dhe daljes nga sistemi. Shkaktar që e ka katandisur PD në këtë gjendje. Ndrysimet e Kodit Zgjedhor të bëra nga mazhoranca e sotme me ndihmën e “KËRPËRATAVE”, duke hequr mundësinë e koalicioneve parazgjedhore me lista më vete siç ishte më parë ka qënë dhurata më e madhe që ka marrë kjo mazhorancë nga ata që dogjën mandatet dhe kërpëratat që u futën në parlament më pas. Nëse nuk do ishin bërë ato ndryshime në ligjin zgjedhor, PD në 2021 do të kishte fituar zgjedhjet.
Kam qenë ndër të parët që në 2021 i kam kërkuar në zyrë Lulzim Bashës që të jepte dorëheqjen pas humbjes së zgjedhjeve. Po të ishte për interes personale nuk do ia kërkoja z.Basha pasi praktikisht ai më vendosi në listë fituese në 2021, por duke vendosur të parin interesin e demokratëve i kërkova që të mbante përgjegjësi.
Ia kam kërkuar edhe publikisht atëherë z. Berisha që të mos e mbështeste Bashën. Rikonfirmimi i Bashës në krye të PD pas humbjes së zgjedhjeve u bë i mundur me “bekimin” e Berishës.
Kam kundërshtuar Bashën për vendimarrjen e njëanshme ndaj z. Berisha, ndonëse në atë kohë zgjodha të isha me logon e partisë jo me individët.
Kam kërkuar në forumet e partisë bashkimin artificial mes demokratëve.
Edhe një herë në Korrik të 2024 i vetmi, votova kundër ndryshimeve në Kodin Zgjedhor që të dëmtoi edhe ty z. Murrizi. Paralajmërova edhe rezultatin katastrofik që do merrnim si pasojë e këtij kodi, produkt pazari.
Kam kundërshtuar primaret, duke thënë se PD nuk është në kushtet për ti bërë. Megjithatë iu binda shumicës u futa në primare dhe dola I pari, ndërkohë që ditën e primareve isha në Maltë duke takuar bashkëatdhetarët për votën e diasporës.
Unë mbase mund të kritikohem si demokrat që kundërshtoj shumë dhe nuk vihem në rresht por jo se nuk kam reaguar.
Megjithatë z. Murrizi, mendoj se duhet të merremi me thelbin çfarë kërkohet për rivitalizimin e Partisë Demokratike dhe jo pse tani e pse jo më herët e pse më vonë.
Unë dhe z. Murrizi mund ti kemi mundësitë për të bërë ndonjë ditë pushim në Gusht apo në ndonjë muaj tjetër të vitit, por demokratët, shqiptarët nuk duan një shtet monopartiak apo me një opozitë që “kundërmonë erë” më shumë sesa një mazhorancë 12-vjeçare, e cila po bëhet me dy grupe parlamentare; një jashtë e një brenda hekurave”, shkruan Sula.
