Jack Grealish ka konfirmuar se i është nënshtruar një operacioni pas një frakture stresi në këmbë, duke thënë se “nuk doja që sezoni të përfundonte kështu”. Mesfushori 30-vjeçar, i huazuar te Everton nga Manchester City për gjithë sezonin, u dëmtua më 18 janar gjatë fitores 1-0 kundër ish-skuadrës së tij, Aston Villa.
Grealish zhvilloi 22 ndeshje në të gjitha kompeticionet këtë sezon me Everton-in, duke shënuar dy gola dhe dhuruar gjashtë asistime. Në një postim në Instagram, ai u shpreh i zhgënjyer që sezoni i mbaroi në këtë mënyrë, por tha se operacioni ka përfunduar dhe tani fokusi i tij është rikthimi sa më i shpejtë në formë, “më i fortë dhe më i mirë se më parë”.
Dëmtimi i shuajti shpresat për të qenë pjesë e skuadrës së Anglisë për Kupën e Botës këtë verë. Forma e tij e fundit te Everton kishte ringjallur zërat për një rikthim në kombëtare, por paraqitja e tij më e fundit me Anglinë kishte qenë në tetor 2024, nën drejtimin e trajnerit të përkohshëm Lee Carsley.
Grealish u transferua te Manchester City nga Aston Villa në vitin 2021 për 100 milionë paund, atëherë rekord britanik, dhe fitoi tre tituj të Premier League, Champions League dhe FA Cup. Megjithatë, sezonin e kaluar humbi hapësirat, duke nisur vetëm shtatë ndeshje si titullar në kampionat dhe u la jashtë skuadrës për Kupën e Botës për Klube në SHBA, përpara se të kalonte në huazim te Everton. Ai falënderoi klubin dhe tifozët për mbështetjen, duke shtuar se do ta ndjekë ekipin nga afër dhe do të bëjë gjithçka për t’u kthyer sa më shpejt në fushë.
