Numri i makinave që hyjnë çdo ditë në Shqipëri po rritet ndjeshëm. Vetëm këtë vit, deri në muajin shtator, janë importuar 76 mijë mjete, duke rezultuar në një mesatare prej 284 makinash në ditë. Këto mjete regjistrohen për t’u shitur më pas në treg, duke reflektuar një rritje të dukshme në oferten e automjeteve.
Nga janari deri në shtator, numri i makinave të importuara ka arritur të jetë i barabartë me totalin e vitit të kaluar, duke shkaktuar një rritje të trafikut në rrugët kombëtare dhe në qendrat e mëdha urbane. Kjo situatë ka bërë që të gjeturit e vendeve për parkim të bëhet gjithnjë e më sfiduese.
Vendet kryesore nga të cilat po importohen këto mjete janë Koreja e Jugut, Italia dhe Gjermania, të cilat përbëjnë rreth 55% të totalit. Sipas statistikave, në këtë periudhë kanë hyrë 96 marka të ndryshme, me Volkswagen, Mercedes dhe Audi që dominojnë, duke përbërë 54% të ‘flotës’ së re, shkruan IliriaNews.al.
Një tjetër statistikë e rëndësishme është se 80% e makinave të ardhura këtë vit janë prodhuar para vitit 2015, çka tregon se shumica e blerësve po preferojnë mjete me një kilometrazh të lartë, mbi 100 mijë km.
Tirana është qyteti ku rreth 40% e makinave porositen, ndërsa numri i makinave aktive të regjistruara ka arritur në 320 mijë. Në të gjithë vendin, ky numër arrin në 915 mijë, duke rezultuar në një makinë për çdo 3 banorë. Kjo tendencë tregon një ndryshim të rëndësishëm në zakonin e blerjes së automjeteve në Shqipëri dhe ndikon ndjeshëm në infrastrukturën rrugore të vendit.
