Zbardhja e ngjarjes së rëndë në Spitallë ka bërë që dy familjet Habibi dhe Shkoza të konfliktohen me njëra-tjetrën. Kësisoj është dashur ndërhyrja e policisë së Durrësit për të qetësuar situatën.
Fillimisht ngjarja u raportua si aksidentale, por nga hetimet e policisë rezultoi se Branko Shkoza është vrarë nga shoku i tij 35-vjeçari Majlind Habibi.
Autor i krimit është arrestuar pasi dyshohet se pas një përleshje ka shtyrë nga ura 33-vjeçarin, i cili për pasojë ndërroi jetë. Kanë qenë kamerat e disa bizneseve në zonën ku ndodhi ngjarja që kanë zbardhur krimin në Durrës.
Ishin banorët të parët që konfirmuan se i kishin parë Majlind Habibin dhe Branko Shkozen bashkë atë natë. Hetuesit kanë shkuar në banesën e Majlind Habibit ku e morën ën pyetje. Habibi fillimisht e ka mohuar krimin, duke thënë se nuk e njihte 33-vjeçarin, por pasi e ballafaquan me pamjet filmike nga kamerat, ai ka pranuar të bashkëpunojë duke rrëfyer krimin.
Sipas dëshmisë së tij, viktima i kishte ngacmuar bashkëshorten dhe kjo e fundit i ishte ankuar shpeshherë se 33-vjeçari e ngacmonte sa herë që dilte nga shtëpia e saj.
