Kryeministri Edi Rama e ka nisur ditën këtë të premte me anëtarët e rinj të kabinetit qeveritar, duke i prezantuar ata për të gjithë qytetarët. Ministra që morën sërish besimin e tij, të rinj dhe dikastere të riformatuara që u prezantuan në Asamblenë Kombëtare.
“Mirëmëngjes dhe me FotoALBUMIN e qeverisë së re për Shqipërinë 2030 në BE, ju uroj një ditë të mbarë”, shkruan Edi Rama dhe ndan fotografitë me një përshkrim të shkurtër shpjegues për secilin anëtar të kabinetit.
Asambleja Kombëtare e Partisë Socialiste është mbledhur këtë të enjte në Tiranë, për të bërë bilancin e rrugëtimit të fundit 4 vjeçar të kësaj force politike në drejtimin e vendit, si dhe për të njohur të vetët dhe gjithë shqiptarët me Kabinetin “Rama 4”.
Si askush tjetër në Shqipërinë demokratike, Edi Rama do të qeverisë për një mandat të katërt radhazi, ndërsa sot, qeveria që ai shpalli dje në Asamble, pritet të votëbesohet në Kuvend. Sipas dekretit të Presidentit Begaj, Kuvendi duhet të mblidhet më 12 Shtator.
Ashtu si çdo herë, Edi Rama ia arriti që edhe kësaj radhe të ruajë ekskluzivitetin e emrave të bashkëpunëtorëve, me të cilët do të drejtojnë vendin në nisje të këtij kapitulli të ri.
