Neymar ka dhënë sinjalin e parë pozitiv për Brazilin në prag të ndeshjeve të radhës në Kupën e Botës 2026. Ylli brazilian është rikthyer në fushën e stërvitjes, duke zhvilluar ushtrime individuale për herë të parë që nga mbërritja e kombëtares në Shtetet e Bashkuara.
Sulmuesi, i cili ka qenë jashtë për rreth një muaj për shkak të një dëmtimi në pulpën e djathtë, la palestrën dhe nisi punën në fushë në bazën e Brazilit në Morristown, New Jersey.
Federata Braziliane e Futbollit njoftoi se Neymar “ka hedhur një tjetër hap në procesin e rikuperimit”, ndërsa pamjet e publikuara e treguan atë duke kryer vrapime të lehta dhe ushtrime nën mbikëqyrjen e stafit të Carlo Ancelottit.
Pavarësisht përfshirjes në listën finale të Botërorit, Neymar mbërriti në grumbullim me shumë pikëpyetje për gjendjen fizike. Objektivi më realist për rikthimin e tij mbetet faza me eliminim direkt, ndërsa pritet të mungojë në ndeshjet e mbetura të grupit ndaj Haitit dhe Skocisë.
Ancelotti ka mbështetur publikisht sulmuesin, duke theksuar se Brazili ka nevojë jo vetëm për cilësitë e tij teknike, por edhe për eksperiencën dhe ndikimin që ai ka te lojtarët e rinj.
“Neymar po punon shumë për t’u rikuperuar sa më shpejt. E kemi përfshirë në listë për aftësitë e tij teknike, që janë të padiskutueshme, por edhe për eksperiencën dhe shembullin që jep për lojtarët e rinj”, tha Ancelotti.
Për Neymar, ky Botëror është një sfidë e madhe personale pas një periudhe të gjatë dëmtimesh. Ai nuk ka luajtur me Brazilin që nga tetori i vitit 2023, kur pësoi një dëmtim të rëndë ndaj Uruguait.
