Neymar ka nisur një proces gjyqësor kundër një gazetari brazilian, i cili e akuzoi se është “i varur nga uiski, pi shisha, konsumon pije energjike dhe luan videolojëra deri në orët e para të mëngjesit”. Përfaqësuesit e futbollistit e kanë cilësuar këtë deklaratë si “të pamatur, shpifëse, denigruese dhe të pavërtetë”.
Gazetari Rodolfo Gomes shtoi gjithashtu se Neymar nuk do të rikthehet këtë vit, pavarësisht parashikimeve që flasin për një rikuperim në nëntor. Ai pretendoi se zakonet e natës të lojtarit po ndikonin edhe tek pjesa tjetër e skuadrës, madje se stërvitjet ishin vonuar për t’i dhënë mundësi atij të merrte pjesë.
Neymar është jashtë fushave që prej 18 shtatorit, kur pësoi një dëmtim të shkallës së dytë në muskulin rectus femoris të këmbës së djathtë gjatë stërvitjes me Santos.
Përmes një postimi në Instagram, lojtari iu përgjigj akuzave me humor, duke shpërndarë një foto me një pije energjike të shoqëruar me mbishkrimin: “I varur nga Red Bull. Kjo është shumë e mirë”.
Ndërkohë, tensioni mbetet i lartë tek Santos, që ndodhet në vendin e 16-të në kampionatin brazilian me vetëm 28 pikë, pesë më shumë se zona e rrezikut. Me 10 ndeshje të mbetura deri në fund, frika nga rënia në kategorinë e dytë është reale dhe shton presionin mbi ekipin.
