Izraeli ka rifilluar luftimet, theksoi Benjamin Netanyahu, disa orë pas sulmit ajror të IDF në Gaza që shkaktoi qindra të vdekur.
Në një mesazh televiziv të martën, Netanyahu tha, ndër të tjera, se Izraeli kishte bërë përpjekje për të kthyer pengjet dhe se kishte zgjatur me javë fazën e parë të armëpushimit.
Izraeli, theksoi ai gjithashtu, dërgoi delegacione në Doha dhe Kajro, megjithatë, tha Netanyahu, çdo herë Hamasi refuzonte propozimet.
Sulmet e nisura gjatë natës dhe që do të vazhdojnë të martën janë “vetëm fillimi”, tha kryeministri izraelit, i cili theksoi se vendi i tij do të vazhdojë të luftojë për të arritur qëllimet e tij, duke përfshirë lirimin e të gjithë pengjeve.
“Ne kemi bërë arritje të pabesueshme deri më sot”, tha ai, duke iu drejtuar izraelitëve, teksa shtoi se “së bashku ne po ndryshojmë fytyrën e Lindjes së Mesme”.
Megjithatë, ai vazhdoi duke thënë se Izraeli është në mes të luftës. Unë vlerësoj veçanërisht “miqtë tanë amerikanë” që po veprojnë kundër Iranit, tha Netanyahu dhe përfundoi duke thënë se “ne do t’i mposhtim ata”.
