Kryeministri i Izraelit, Benjamin Netanyahu, ka deklaruar se vendi i tij është i gatshëm dhe i aftë të shkatërrojë të gjitha objektet bërthamore të Iranit, përfshirë edhe instalacionin nëntokësor në Forodo, një nga më të mbrojturit në territorin iranian.
Në një intervistë për televizionin publik KAN 11, Netanyahu tha:
“Do të godasim të gjitha objektet e tyre bërthamore. Kemi kapacitetin për ta bërë këtë. Çdo ndihmë nga aleatët është e mirëpritur.”
Ai shtoi se ndryshimi i regjimit në Iran nuk është një qëllim i drejtpërdrejtë i Izraelit, por një rezultat i mundshëm i përshkallëzimit të konfliktit:
“Rënia e regjimit është çështje e popullit iranian. Ne nuk e kemi atë si objektiv zyrtar, por mund të ndodhë si pasojë.”
Izraeli: “Kemi shkatërruar më shumë se gjysmën e lëshuesve të raketave iraniane”
Netanyahu po ashtu bëri të ditur se që nga fillimi i sulmeve më 13 qershor, Izraeli ka neutralizuar më shumë se 50% të lëshuesve të raketave të Iranit.
I pyetur për shifrat, ai theksoi se më shumë rëndësi ka shkatërrimi i mekanizmave të lëshimit të raketave, sesa vetë raketat, duke shtuar se ky është një tregues i qartë i efikasitetit ushtarak të Izraelit në ditët e para të luftës.
Tensionet mes dy vendeve vijojnë të rriten, ndërsa komuniteti ndërkombëtar i ndjek zhvillimet me shqetësim për një përshkallëzim të mundshëm rajonal.
