Kryeministri izraelit Benjamin Netanyahu dëshiron të takohet me Presidentin e SHBA-së Donald Trump në Shtëpinë e Bardhë në javët e ardhshme për të festuar bombardimin e programit bërthamor të Iranit, raportoi Axios, duke cituar tre zyrtarë izraelitë.
Dy zyrtarë izraelitë thanë se diskutimet fillestare kanë ndodhur tashmë midis këshilltarëve të Netanyahut dhe zyrtarëve të Shtëpisë së Bardhë, megjithëse një datë nuk është caktuar ende.
Një zyrtar tjetër izraelit tha se vizita mund të zhvillohet në javën e dytë të korrikut.
Një zëdhënës i Netanyahut tha se nuk ishte në dijeni të një vizite të planifikuar në Uashington dhe Shtëpia e Bardhë nuk iu përgjigj një kërkese për koment.
Ndërkohë, një zyrtar izraelit tha se “ekziston një interes i ndërsjellë nga të dyja palët për të pasur një festë fitoreje pas luftës me Iranin”.
Ky imazh i një fitoreje të madhe përçohet edhe nga Netanyahu në deklaratat e tij.
“Ne luftuam me vendosmëri kundër Iranit dhe arritëm një fitore të madhe. Kjo fitore hap rrugën që ne të zgjerojmë në mënyrë dramatike marrëveshjet e paqes”, tha Netanyahu në një mesazh video të publikuar nga zyra e tij.
Ai shtoi se, përveç lirimit të pengjeve të mbajtura në Gaza dhe fitores ndaj Hamasit, “ekziston një dritare mundësie që nuk duhet ta humbasim, as për një ditë”.
Duket se Irani i afroi dy udhëheqësit dhe i zbuti tensionet që i karakterizonin ata, thekson Axios.
Një detaj interesant është se të enjten, avokatët e Netanyahut po u kërkojnë gjyqtarëve izraelitë të shtyjnë me dy javë seancat dëgjimore të kryeministrit në gjyqin e tij për korrupsion, i cili ka vazhduar që nga viti 2020.
Avokatët përmendën luftën me Iranin dhe zhvillimet ndërkombëtare për shtyrjen.
Kërkesa e Netanyahut erdhi disa orë pasi Trump postoi në Truth Social, duke bërë thirrje që gjyqi i Netanyahut të anulohet ose që ai të falet.
