Juventusi po shtyn fort për Alisson Becker. Portieri brazilian i Liverpoolit është objektivi kryesor i bardhezinjve për t’i dhënë skuadrës një numër 1 të ri dhe bisedimet për transferimin e tij po marrin gjithnjë e më shumë formë.
Sipas raportimeve, rreth ndeshjes ndaj Milanit, përfaqësuesit e 33-vjeçarit do të jenë në Itali, ku pritet të zhvillohen kontaktet e para konkrete për të çuar përpara negociatat. Në këtë mënyrë, një samit mes palëve duket gjithnjë e më pranë.
Pas tetë sezonesh te Liverpooli, Alisson shihet i intriguar nga mundësia për ta mbyllur karrierën si protagonist në një klub të madh italian. Braziliani e njeh mirë Serie A, pasi ka luajtur më parë te Roma, ku edhe nisi ngjitjen drejt elitës së futbollit europian.
Për Juventusin, Alisson do të sillte eksperiencë, siguri dhe mentalitet fitues, cilësi që konsiderohen thelbësore për të rritur nivelin e skuadrës dhe për ta bërë konkurruese për titullin që sezonin e ardhshëm.
Çështja kryesore mbetet paga e portierit, që aktualisht përfiton 5 milionë euro neto në sezon plus bonuse. Juventusi është gati t’i ofrojë një kontratë trevjeçare me shifra më të ulëta, me mundësinë e një viti shtesë në favor të klubit. Ideja e bardhezinjve është t’i paraqesin Alissonit një marrëveshje afatmesme deri afatgjatë, që mund ta bindë për një zgjedhje të rëndësishme në këtë fazë të karrierës.
Nëse arrihet një marrëveshje përfundimtare me lojtarin, atëherë Juventusi do të hapë bisedimet edhe me Liverpoolin. Në sfond mbetet edhe emri i Michele Di Gregorio, një profil që anglezët e kishin ndjekur me interes edhe më parë.
