Armando Broja, sulmuesi shqiptar i Burnley në Premier League, po përjeton një periudhë të vështirë për shkak të dëmtimeve të shpeshta që e kanë përcjellë gjatë karrierës së tij.
Në ndeshjen e fundit ndaj Anglisë, Broja u aktivizua në pjesën e dytë, por pas vetëm 15 minutash, ai u detyrua të largohej nga fusha me barrelë.
Ky incident shënoi një moment prekës, me Brojën që u tërhoq nga loja duke qarë, duke theksuar peshën emocionale që ka kjo situatë për të.
Sipas tabloidit britanik Daily Mail, Broja ka humbur plot 80 ndeshje për shkak të dëmtimeve, që e kanë bërë të vështirë për të ndërtuar një karrierë të qëndrueshme.
Tifozët, nga ana tjetër, kanë reaguar me mbështetje, duke ndarë mesazhe inkurajuese në rrjetet sociale. Një nga mesazhet tha: “Sa herë Broja dëmtohet, ndjej dhimbje si vetë, ky djalë është kaq i pafat.”
Armando ka filluar karrierën e tij në akademinë e Tottenham, para se të transferohej te Chelsea.
Gjatë qëndrimit të tij te Chelsea, ai u dha me huazime te Vitesse dhe Southampton nga viti 2020 deri në 2022.
Më pas, ai u bë pjesë e skuadrës së parë të Chelsea, ku nisi sezonin mjaft mirë, por pësoi një dëmtim të rëndë në ligamentet e gjurit që e la jashtë fushave për rreth një vit.
Pas Rikthimit të tij nga dëmtimi, Broja kaloi me huazim te Everton dhe Fulham pa arritur të shënojë asnjë gol.
Tani, me kalimin te Burnley, situata nuk duket më e ndritshme, pasi ai duket se po përballet sërish me një dëmtim të ri.
Pritet që së shpejti të publikohet shkalla e dëmtimit, ndërsa tifozët shpresojnë për një shërim të shpejtë për një lojtar që duket se është goditur nga një “mallkim” dëmtimesh.
Situata e tij mbetet një shqetësim i madh, jo vetëm për të, por edhe për klubet ku ka luajtur.
