Deputeti i Partisë Demokratike, Saimir Korreshi, i ka rikujtuar kryetarit të Kuvendit, Niko Peleshi, kërkesën e tij për zhvillimin e një interpelance me ministren e Shëndetësisë, Evis Sala, duke kërkuar që ajo të merret në konsideratë sa më shpejt.
Gjatë fjalës së tij në Kuvend, Korreshi ironizoi procesin, duke thënë se deputetët janë të kategorizuar dhe se “fshatarëve nuk u vjen radha”. Ai e krahasoi situatën me periudhën para viteve ’90, kur qytetarët prisnin në radhë për furnizime, por shpesh nuk arrinin t’i merrnin.
Sipas tij, problematika në spitalin e Lushnjes është urgjente dhe nuk mund të presë deri në momentin kur ministrja të jetë e gatshme për interpelancë.
“Korreshi me nder jush jam bërë edhe unë një kërkesë për interpelancë me shoqen ministre të punëve të shëndetit. Janë kategorizuar këtu deputetët, ne fshatarëve nuk na vjen radha? Kujtohet para ’90, kur mbaja radhën për vaj guri, kur më vinte mua radha nuk kishte më vajguri.
Edhe kjo pjesa e interpelancës po në të njëjtin nivel jeni. Në Lushnje nuk pret situata se kur do ta ketë terezinë ministrja. Ajo ka ca batuta të bukura e thotë në fund të vitit por deri atëherë nuk premton situata për spitalin e Lushnjes. Merr masa si kryetar i Kuvendit se kam dy muaj që e kërkoj këtë interpelancë . “, u shpreh Korreshi.
