Dy persona janë proceduar penalisht nga Policia e Kavajës, pasi dyshohet se ndezën zjarre në mënyrë të pakontrolluar në fshatrat Gosë e Madhe dhe Luz i Madh, duke shkaktuar dëme në sipërfaqe toke.
Ngjarja ndodhi mbrëmjen e kaluar, kur shërbimet e Komisariatit të Policisë Kavajë u njoftuan për rënie zjarri në këto dy zona rurale. Menjëherë pas marrjes së sinjalizimit, forcat policore u nisën drejt vendngjarjeve dhe ndërmorën veprime të shpejta hetimore.
Si rezultat i hetimeve paraprake, u identifikuan dy autorët e dyshuar, R. S., 66 vjeç, banues në fshatin Gosë e Madhe, dhe F. K., 70 vjeç, banues në Luz i Madh. Dyshohet se ata kishin ndezur zjarre për djegien e mbeturinave, por përhapja e flakëve ka sjellë djegien e dy sipërfaqeve toke në pronësi të tyre.
Të dy shtetasit janë proceduar në gjendje të lirë, ndërsa materialet hetimore i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
