Stilisti i njohur italian, Giorgio Armani, ka ndërruar jetë në moshën 91-vjeçare, ka bërë të ditur Grupi Armani të enjten.
“Zoti Armani, siç e quanin gjithmonë me respekt dhe admirim punonjësit dhe bashkëpunëtorët, u nda nga jeta në mënyrë paqësore, i rrethuar nga të dashurit e tij,” thuhet në deklaratën zyrtare të kompanisë, duke e përshkruar themeluesin si “një forcë lëvizëse e palodhur.”
Në një deklaratë të shpërndarë nga familja dhe punonjësit thuhet:
“Në këtë kompani, gjithmonë jemi ndjerë si pjesë e një familjeje. Sot, me emocion të thellë, ndjejmë boshllëkun e lënë nga ai që themeloi dhe rriti këtë familje me vizion, pasion dhe përkushtim. Por, pikërisht në shpirtin e tij, ne, punonjësit dhe anëtarët e familjes që kemi punuar gjithmonë krah tij, angazhohemi ta mbrojmë atë që ai ndërtoi dhe ta çojmë përpara kompaninë në kujtim të tij, me respekt, përgjegjësi dhe dashuri.”
Në qershor të vitit 2025, Armani mungoi për herë të parë në karrierën e tij në përfundimin e sfilatës së markës gjatë Javës së Modës për Meshkuj në Milano. Në atë kohë, kompania njoftoi se ai ishte “duke u rikuperuar në shtëpi,” pa dhënë detaje të mëtejshme mbi gjendjen e tij shëndetësore.
Vdekja e tij shënon fundin e një epoke në modën italiane dhe botërore.
