Në raportin vjetor të saj, Asambleja Parlamentare e NATO-s ka shprehur shqetësim për situatën në Kosovë dhe Bosnje-Hercegovinë, duke paralajmëruar se rreziqet për sigurinë në këto shtete mund të rriten nëse Bashkimi Evropian dhe NATO nuk angazhohen më intensivisht.
Raporti i cilëson ngjarjet e fundit në veri të Kosovës si një “thirrje zgjimi” për komunitetin ndërkombëtar dhe kërkon dërgimin e trupave shtesë në vend sa më shpejt. Lord Mark Lancaster, autor i dokumentit dhe anëtar i Parlamentit të Mbretërisë së Bashkuar, thekson se “prania e forcave të NATO-s në Kosovë mund të rritet në përputhje me zhvillimet në terren dhe situatën rajonale”.
Në raport, vëmendja i kushtohet nevojës për një shtim të forcave të NATO-s, duke e cilësuar si një prioritet të rëndësishëm për parandalimin e dhunës dhe për ndihmën në ndërtimin e besimit ndërmjet të gjitha grupeve komunitare në Kosovë.
Njëkohësisht, theksohet se mungesa e normalizimit të marrëdhënieve mes Kosovës dhe Serbisë mbetet sfida më e madhe për stabilitetin e Ballkanit Perëndimor. Prandaj, NATO dhe BE i kërkohet të ushtrojnë presion mbi të dyja palët për të zbatuar marrëveshjen e Ohrit dhe për të promovuar një proces të qëndrueshëm paqeje dhe bashkëpunimi.
