Grupi prej 5 personash që mashtruan biznesmenin shkodran, 3 prej të cilëve të arrestuar, dyshohet se janë pjesë e grupit të të shumëkërkuarit, Florian Gjergji.
Gjergji akuzohet gjithashtu për veprën penale “mashtrimi”.
Të dielën policia arrestoi Krenar Toromenin, Ilia Gjinin dhe Artur Lecinin. Tre të arrestuarit e kishin marrë biznesmenin shkodran në aplikacionin Viber me një numër të paregjistruar dhe i ishin prezantuar si miku i ngushtë i Tonin Marinajt, kryetarit të bashkisë në Malësi e Madhe.
Të arrestuarit i kanë kërkuar shumën prej 40 mijë euro, me pretendimin se do ua çonon Marinajt dhe do ia kthente brenda pak ditësh.
Sipas biznesmenit, paratë ua ka dhënë me mirëbesim dhe në mbrëmje pasi ka marrë Tonin Marinajn në telefon për ta pyetur nëse i kishte marrë paratë, ka kuptuar se ishte mashtruar.
Pasi bëri kallëzimin në polici, autorët u identifikuan nga kamerat e një biznesi pranë Rinasit, ku edhe ishin dhënë paratë.
