Kompania e Inteligjencës Artificiale, xAl e Elon Musk ka blerë X – rrjetin social të njohur më parë si Twitter – për 33 miliardë dollarë (30 miliardë euro), duke shënuar kthesën më të fundit në konsolidimin e shpejtë të pushtetit të miliarderit.
Marrëveshja e të gjitha aksioneve e shpallur të Premten kombinon dy nga kompanitë e shumta të Musk, të cilat përfshijnë gjithashtu prodhuesin e automjeteve Tesla dhe SpaceX, dhe potencialisht lehtëson aftësinë e Musk për të trajnuar modelin e tij të AI të njohur si Grok.
Bëhet e ditur se Musk njoftoi transaksionin në një postim në X, duke thënë: “Kombinimi vlerëson xAI në 80 miliardë dollarë dhe X në 33 miliardë dollarë.”
“E ardhmja e xAI dhe X janë të ndërthurura”, shkroi ai.
“Sot, ne kemi ndërmarrë zyrtarisht hapin për të kombinuar të dhënat, modelet, llogaritjen, shpërndarjen dhe talentin”, vazhdoi njeriu më i pasur në botë.
Pjesa më e madhe e specifikave të marrëveshjes mbeten të paqarta, të tilla si mënyra se si mund të kompensohen investitorët, si udhëheqësit e X do të integrohen në kompaninë e re ose perspektiva e kontrollit rregullator, shkruan the Guardian.
Musk, njeriu më i pasur në botë, ka konsoliduar gjithashtu pushtetin e tij në Uashington duke mbikëqyrur përpjekjet e administratës Trump për uljen e kostove si kreu i të ashtuquajturit Departamenti i Efikasitetit të Qeverisë, ose Doge.
Kjo gjithashtu e ka vënë atë në pozicionin për të ndikuar potencialisht në agjencitë që mbikëqyrin marrëdhëniet e tij të biznesit.
Raportohet se Musk nuk kërkoi miratim nga investitorët për këtë lëvizje, por u tha atyre se të dy kompanitë kishin bashkëpunuar ngushtë dhe integrimi do të nxiste një integrim më të thellë me Grok.
Ndryshe, në shkurt, Musk bëri një ofertë prej 97.4 miliardë dollarësh me një konsorcium për krijuesin e ChatGPT, OpenAI, e cila u refuzua, me OpenAI duke thënë se startupi nuk ishte në shitje.
Musk bashkëthemeloi OpenAI me CEO Sam Altman në 2015.
Ndërsa konkurrenca në Al intensifikohet, xAI ka rritur kapacitetin e qendrës së të dhënave për të trajnuar modele më të avancuara dhe grupi i saj i superkompjuterëve në Memphis, Tennessee, i quajtur Colossus, shpallet si më i madhi në botë.
