Dy murgesha braziliane janë bërë virale në rrjetet sociale pasi performuan një sesion spontan beatbox-i dhe vallëzimi gjatë një programi televiziv katolik.
Motrat Marizele Cassiano dhe Marisa de Paula, pjesë e kongregatës “Copiosa Redenção”, po flisnin për një seminar fetar në kanalin televiziv brazilian Pai Eterno (Ati i Përjetshëm), kur biseda kaloi te një këngë që fliste për thirrjen në jetën fetare.
Aty nisi surpriza: të dyja u ngritën dhe nisën të këndonin, të bënin beatbox dhe të vallëzonin me shumë energji. Edhe prezantuesi, Diakoni Giovani Bastos, iu bashkua motrave, duke ndjekur lëvizjet e motrës Marisa në një performancë që tashmë është parë nga miliona ndjekës në Brazil dhe jashtë tij.
“Ishte një moment krejtësisht spontan. Me motrën Marisa, nëse i jep një ritëm, ajo kërcen menjëherë. Unë jam mësuar me këngën dhe beatbox-in, ndaj për ne ishte diçka shumë e thjeshtë, e natyrshme… por edhe shumë surprizuese që u bë virale jashtë Brazilit,” tregoi motra Marizele për agjencinë Associated Press.
Murgeshat janë të përkushtuara ndaj të rinjve që përballen me varësinë nga droga dhe thonë se muzika është një mjet i fuqishëm në misionin e tyre.
“Beatbox-i, vallëzimi, vetë këngët – janë mjete që Zoti i përdor për të prekur zemrat e atyre me të cilët punojmë. Dhe funksionon! Është e mrekullueshme ta shohësh,” shton motra Marizele.
Ndërsa motra Marisa nuk ka llogari në rrjetet sociale, motra Marizele ka kaluar tashmë 100 mijë ndjekës në Instagram pas famës së fituar nga videoja e beatbox-it.
Përveç misionit të tyre me të rinjtë, ato janë edhe promovuese të thirrjeve fetare, duke organizuar retreate për gra që duan të ndjekin jetën murgeshërore.
