I shoqëruar nga forcat e policisë, ka mbërritur vetëm para pak çastesh në ambientet e Gjykatës Administrative, kryetari i Bashkisë së Tiranës, Erion Veliaj. Pas pak çastesh pritet të nisë seanca e radhës gjyqësore që mbahet mes Veliajt dhe prokurorit të Posaçëm, Olsi Dado.
Ndërkohë, avokati i tij, Plarent Ndreca, nuk është paraqitur, pasi ka njoftuar Gjykatën se ndodhet me fëmijën e tij në urgjencë.
Seanca e fundit u shty për t’u dhënë kohë palëve të shqyrtojnë kërkesën e shoqatës “Asociacioni Kombëtar i Medias dhe Drejtësisë”, e cila ka kërkuar të përfshihet si palë në procesin gjyqësor.
Shoqata i është drejtuar Gjykatës Administrative me kërkesën që të shpallë të pavlefshëm dekretin për emërimin e Ols Dados si prokuror në vitin 2008.
Sipas përfaqësuesve të saj, çështja ka interes të gjerë publik, pasi lidhet me integritetin e sistemit të drejtësisë, një prej objektivave kryesorë të veprimtarisë së kësaj organizate.
Nga ana tjetër, kryebashkiaku kërkon anulimin e dekretit presidencial me të cilin Ols Dado u emërua prokuror në vitin 2008, duke argumentuar se ai nuk kishte përfunduar Shkollën e Magjistraturës.
Palë e paditur në këtë proces është edhe Presidenca, institucioni që në atë kohë, nën drejtimin e Bamir Topit, dekretoi emërimin e Ols Dados në detyrën e prokurorit.
Për shkak të mungesës së avokatit të Veliajt, gjykata vendosi shtyrjen e seancës më 24 korrik.
Pjesë nga komunikimi në Gjykatën Administrative:
Veliaj: Dua të deklaroj se pa praninë e avokatit nuk mund të vazhdohet seanca.
Avokati i Ols Dados: E lë në vlerësim të Gjykatës.
Gjykata: Në kuadër të mbrojtjes efektive e shtyjmë seancën për datën 24 korrik, ora 09:00.
Veliaj: Unë pa punë jam, kështu që…
