Jose Mourinho është në negociatat finale për t’u rikthyer si trajner i Real Madrid, 13 vite pas aventurës së tij të parë në Santiago Bernabeu.
Sipas BBC Sport, 63-vjeçari është favoriti kryesor dhe aktualisht kandidati i vetëm me të cilin madrilenët po bisedojnë për postin e trajnerit. Ai pritet të zëvendësojë Alvaro Arbeloa, i cili mori drejtimin e skuadrës në janar pas largimit të Xabi Alonso.
Florentino Perez kishte nisur të mendonte për rikthimin e Mourinho vetëm dy ditë pas largimit të Alonso, duke hapur kontaktet e para me përfaqësuesit e trajnerit portugez.
Mourinho aktualisht drejton Benfica, ku u emërua në shtator me një kontratë dyvjeçare. Megjithatë, pas ndeshjes së fundit të sezonit ndaj Estoril Praia, Real Madrid mund të përfitojë nga një klauzolë që i lejon trajnerit të largohet për 3 milionë euro brenda 10 ditëve.
Trajneri portugez ka drejtuar Real Madrid nga viti 2010 deri në vitin 2013, periudhë gjatë së cilës fitoi La Liga, Copa del Rey dhe Superkupën e Spanjës.
Rikthimi i mundshëm i Mourinho lidhet edhe me situatën e vështirë brenda klubit. Real Madrid e ka mbyllur sezonin pa trofe, ndërsa në dhomën e zhveshjes ka pasur tensione, përfshirë edhe përplasjen mes Aurelien Tchouameni dhe Federico Valverde.
Te Real Madrid besohet se Mourinho mund të rikthejë autoritetin, disiplinën dhe kontrollin emocional në një skuadër që ka kaluar një sezon të trazuar. Për Perez, portugezi shihet si një figurë e fortë, e aftë për të vendosur rregull dhe për të menaxhuar lojtarë me personalitet të madh.
Nëse marrëveshja finalizohet, Mourinho do të rikthehet në Madrid me një presion të madh: të sjellë menjëherë trofe dhe të rikthejë skuadrën në majat e futbollit spanjoll dhe europian.
