José Mourinho është rikthyer te Real Madrid dhe ka dhënë intervistën e parë pas marrjes së detyrës si trajner i madrilenëve. Në një rrëfim për Vanity Fair, tekniku portugez foli për motivimin e tij, skuadrën dhe mënyrën si e sheh këtë etapë të dytë në Madrid.
“E dua Real Madridin, prandaj jam kthyer”, u shpreh Mourinho, duke treguar qartë arsyen e rikthimit të tij në klub.
Portugezi theksoi se këtë herë vjen me një qasje më të qetë dhe më të hapur në komunikim. Ai deklaroi se nuk dëshiron të jetë më i rëndësishëm se lojtarët dhe se objektivi i tij është të krijojë një dialog të sinqertë me skuadrën.
“Nuk kam dashur kurrë të jem më i rëndësishëm se lojtarët e mi. Nuk kam qenë dhe nuk dua të jem”, tha Mourinho.
Trajneri mbrojti edhe periudhën e tij të parë te Real Madrid, duke kujtuar se skuadra e tij ishte ndër më produktivet në historinë e futbollit spanjoll. “Ekipi që shënoi më shumë gola në historinë e futbollit spanjoll ishte Real Madridi im. A ishte vërtet aq mbrojtës ai ekip?”, u shpreh ai.
Mourinho foli edhe për Kylian Mbappé, të cilin e cilësoi një lojtar fenomenal. Ai tha se dëshiron ta njohë nga afër dhe ta ndihmojë të bëhet edhe më i mirë në këtë aventurë të re.
