José Mourinho pritet të rikthehet te Real Madrid dhe do të marrë me vete edhe stafin e tij të besuar nga Benfica.
Sipas raportimeve, marrëveshja konsiderohet e mbyllur dhe mungon vetëm firma zyrtare, e cila pritet të vijë në varësi të procesit zgjedhor te klubi madrilen.
João Tralhão dhe Pedro Machado, dy asistentët e Mourinho te Benfica, do ta shoqërojnë në Madrid. Bashkë me ta pritet të vijë edhe Roberto Merella, analisti aktual i trajnerit portugez.
Tralhão konsiderohet si krahu i djathtë i Mourinho. Ai ishte edhe personi që doli në konferencë për shtyp në Bernabéu këtë sezon, kur Mourinho ishte i pezulluar në Champions League.
Pedro Machado ka një profil të lidhur edhe me përgatitjen fizike, ndërsa më parë ka punuar në disa klube portugeze si trajner dhe asistent. Ai ka qenë pjesë e stafit të Mourinho te Fenerbahçe dhe Benfica.
Roberto Merella, 37 vjeç, do të ketë rolin e analistit. Italiani ka punuar më parë me Mourinho te Roma, më pas e ka ndjekur te Fenerbahçe dhe Benfica, ndërsa tani pritet të jetë pjesë e stafit në Real Madrid.
Për momentin, këta janë tre emrat kryesorë që pritet të shoqërojnë Mourinho në stolin e Bernabéu. Real Madrid pritet të paguajë klauzolën prej 7 milionë eurosh, ndërsa zyrtarizimi mbetet vetëm çështje kohe.
