Përkeqësimi i kushteve atmosferike në bregdet ka sjellë pezullimin e lundrimit detar për mjetet e vogla lundruese dhe anijet e peshkimit.
Kapiteneria e Portit të Vlorës njoftoi se në det të hapur fuqia e erës ka arritur deri në 6 ballë të shkallës Beaufort, ndërsa dallgëzimi ka kapur lartësinë 1.5 metra, duke e bërë të rrezikshme lundrimin për mjetet e vogla.
Sipas autoriteteve portuale, masat kufizuese janë marrë për të garantuar sigurinë e mjeteve lundruese dhe të ekuipazheve, ndërsa thuhet se situata në zonën detare vijon të jetë e paqëndrueshme. Ndërkohë, meteorologët parashikojnë që kushtet atmosferike të përmirësohen gradualisht gjatë ditës së së mërkurës.
Pezullimi i aktivitetit detar ka prekur edhe linjën e tragetit Vlorë–Brindisi. Trageti që duhej të nisej këtë të martë është detyruar të shtyjë udhëtimin për shkak të motit të keq. Sipas njoftimit zyrtar, lundrimi drejt Italisë do të kryhet të mërkurën në mesditë, sapo të krijohen kushtet e nevojshme për një udhëtim të sigurt.
Autoritetet i bëjnë thirrje peshkatarëve dhe poseduesve të mjeteve të vogla lundruese të respektojnë udhëzimet dhe të shmangin daljet në det deri në një njoftim të dytë.
