Autoriteti Portual i Vlorës ka dalë me një njoftim të rëndësishëm për drejtuesit e mjeteve të vogla lundruese dhe anijeve të peshkimit, duke i bërë thirrje që të mos dalin në det deri më 7 janar, për shkak të përkeqësimit të kushteve hidrometeorologjike.
Sipas njoftimit zyrtar, moti i keq pritet të përkeqësohet në ditët në vijim, si brenda ashtu edhe jashtë gjirit të Vlorës, me dallgë që mund të arrijnë deri në 1.5 metra lartësi dhe me erë të fortë.
Në këtë kuadër, Autoriteti Portual bën me dije se:
Është ndaluar pajisja me leje-nisje për mjetet e vogla lundruese dhe anijet e peshkimit që operojnë brenda gjirit të Vlorës dhe në det të hapur, nga ora 06:00 e datës 02.01.2026 deri në orën 06:00 të datës 07.01.2026.
Drejtuesit e mjeteve lundruese dhe të peshkimit duhet të marrin në konsideratë kushtet e rënda detare dhe të marrin masa për sigurimin e mjeteve të tyre.
Anijet e transportit ndërkombëtar detar do të vijojnë të operojnë normalisht, sipas destinacioneve përkatëse.
