Skena prekëse u regjistruan në Filipine gjatë Kampionatit Botëror të Volejbollit për meshkuj.
Trajneri legjendar i Brazilit, Mbernardinjo, pak minuta para nisjes së ndeshjes kundër Serbisë, mësoi lajmin e rëndë për ndarjen nga jeta të nënës së tij.
Tekniku brazilian nuk arriti të përmbante lotët, ndërsa përpiqej të fshihte dhimbjen e tij gjatë nxehjes. Momenti prekës u vu re edhe nga lojtarët, ku Ricardo Lucarelli u afrua për ta ngushëlluar.
Në fushë, Brazili u mposht 3-0 nga Serbia, rezultat që bashkë me fitoren e Çekisë ndaj Kinës solli eliminimin e “seleçao”-s nga Botërori.
Pas ndeshjes, Bernardinjo publikoi një mesazh emocional në rrjetet sociale, ku i dha “lamtumirën e fundit” nënës së tij.
“Shumë i trishtuar që jam larg dhe nuk mund të të përshëndes për herë të fundit, mama. Jam mirënjohës për dashurinë, butësinë dhe përkushtimin tënd për më shumë se 60 vite. U prehsh në paqe. Të dua, mama.”
Lucarelli, që e mbështeti i pari trajnerin, u shpreh pas ndeshjes: “Është një ditë e trishtë. Të gjithë donim këtë fitore për të, por nuk ia dolëm. Ata ishin më të mirë gjatë gjithë kohës. Nuk besoj se luajtëm keq, por gjithçka shkoi në favor të tyre.”
