Vijon dita e dytë e testeve fizike në Milanello, pas hapjes së portave dje, çka në fakt shënoi nisjen e sezonit 2025-2026 dhe fillimin e epokës së dytë kuqezi të Allegrit. Fillimi zyrtar i grumbullimit veror është parashikuar për të hënën, kur Milani do të zbresë në fushë për herë të parë në orën 18:00, ndërsa Allegri do të prezantohet në “Casa Milan” në orën 13:00.
Këtë fundjavë kuqezinjtë po kthehen në bazë për testet e zakonshme fizike para nisjes së sezonit të ri. Dje mbërritën lojtarët e parë, duke filluar nga blerja e re Samuele Ricci, i gatshëm të marrë frenat e mesfushës kuqezi. U panë gjithashtu lojtarë të rëndësishëm si Fofana dhe Loftus-Cheek, që shpreson të rilindë nën drejtimin e Allegrit, pas një viti të vështirë.
Ndër ata që kryen testet dje kishte dhe lojtarë potencialisht në dalje nga klubi: Pobega, Terracciano, Okafor, Liberali dhe Samuel Chukwueze, për të cilin e ardhmja ende nuk është vendosur dhe do të vlerësohet nga Allegri gjatë grumbullimit.
Edhe Malick Thiaw, që pritej të rikthehej sot, e përshpejtoi kthimin e tij me 24 orë për të diskutuar mbi të ardhmen. Como vijon të insistojë për të, por Newcastle është rikthyer të informohet dhe e ardhmja e mbrojtësit gjerman mund të jetë në Premier League. Milani kërkon 25 milionë euro për ta lënë të lirë ish-lojtarin e Schalke 04, shifër që më pas do të investohej për një zëvendësues të nivelit, me kuqezinjtë gati të nisin “derby” merkatoje për Giovanni Leoni të Parmës.
Sot priten në Milanello dy amerikanët Christian Pulisic dhe Yunus Musah, të cilët kanë kaluar dy vera të vështira për arsye të ndryshme. Pulisic është përfshirë në disa debate me trajnerin e kombëtares amerikane Mauricio Pochettino, jo mënyra më e mirë për t’iu afruar Botërorit të ardhshëm, që do të zhvillohet në shtëpi.
Ndërkohë, Musah ishte shumë pranë largimit nga Milani, pasi Napoli kishte arritur marrëveshjen me kuqezinjtë, para se të vendoste të rinovonte me Anguissa. Ish-lojtari i Valencias mbetet sërish në merkato, me interes nga Premier League, pasi Milani po bën revolucion në mesfushë dhe amerikani nuk konsiderohet i pashitshëm.
Sot është parashikuar edhe rikthimi i Fikayo Tomori, lojtari rreth të cilit Allegri synon të ndërtojë mbrojtjen e tij, ndërsa nesër do të mbërrijnë Leao, Maignan, Pavlovic dhe Saelemaekers. Nisja zyrtare e grumbullimit është caktuar për të dielën në mesnatë, moment kur do të startojë realisht epoka e re e Allegrit.
Milani do të nisë stërvitjet e para të hënën pasdite në orën 18:00 në Milanello. Skuadra do të qëndrojë në Itali deri më 18 korrik, ndërsa më 19 korrik do të niset drejt Azisë, ku janë planifikuar tri miqësore: më 23 korrik në Singapor kundër Arsenalit, më 26 korrik në Hong Kong kundër Liverpool-it dhe më 31 korrik në Australi ndaj Perth Glory. Në fillim të gushtit janë parashikuar dy ditë në Britaninë e Madhe, me ndeshjen në Irlandë më 9 gusht kundër Leeds dhe më 10 gusht ndaj Chelsea në “Stamford Bridge”, që do të mbyllë fazën përgatitore.
Debutimi zyrtar i Milanit të ri të Allegrit është caktuar për të dielën, 17 gusht, në orën 21:15 kundër Barit në Kupën e Italisë. Ndeshja e parë e kampionatit do të luhet të shtunën, 23 gusht, në orën 20:45 kundër Cremonese.
