Milani është shumë pranë zyrtarizimit të sulmuesit gjerman, Niclas Füllkrug. Klubi kuqezi po mbyll detajet e fundit me West Ham për ta sjellë “bomberin” në Serinë A.
Sipas raportimeve të fundit, negociatat mes palëve janë në fazën përfundimtare. Vetë sulmuesi ka dhënë miratimin e tij për t’u veshur kuqezi prej ditësh, duke e bërë më të lehtë punën e drejtuesve të Milanit. Aktualisht, dy klubet janë në kontakt të vazhdueshëm për të saktësuar pikat e fundit të marrëveshjes.
Detajet e kontratës Operacioni pritet të mbyllet në formë huazimi me të drejtë blerjeje (opsion jo i detyrueshëm). Shifra e përfolur për blerjen përfundimtare të kartonit të tij llogaritet të jetë nën 14-15 milionë euro. Milani synon që gjithçka të zyrtarizohet brenda pak ditësh, për t’i dhënë trajnerit një forcë të re në repartin ofensiv.
Një shans për rilindje Aventura e Füllkrug në Angli nuk ka qenë ajo që pritej. Këtë sezon me West Ham, sulmuesi gjerman është aktivizuar në 9 ndeshje, por ende nuk ka gjetur rrugën e rrjetës apo të shërbejë asist. Kalimi te Milani shihet si mundësia e artë për sulmuesin që të rigjejë formën e tij më të mirë, ashtu siç bëri në Bundesligë dhe me kombëtaren gjermane.
