Lionel Messi vazhdon të shkëlqejë në MLS. Ylli argjentinas realizoi një hat-trick ndaj Cincinnati në javën e 13-të të kampionatit, duke ndihmuar Inter Miami të marrë një fitore të rëndësishme.
Pas ndeshjes, 38-vjeçari u pyet nga një gazetar për arritjen e 910 golave në karrierë. Si gjithmonë, Messi u përgjigj me modesti, duke theksuar se për të më e rëndësishme është skuadra.
“Sinqerisht, nuk e dija. Siç e kam thënë gjithmonë, nuk shqetësohem shumë për rekordet. Për mua ka më shumë rëndësi të ndihmoj skuadrën të fitojë. Sot morëm tre pikë dhe kjo është gjëja më e rëndësishme”, u shpreh Messi.
Kapiteni argjentinas po kalon një sezon fantastik në MLS, me 12 gola dhe 4 asistime në 14 ndeshje për Inter Miami. Aktualisht, ai renditet i dyti në garën për “Këpucën e Artë” të MLS, pas sulmuesit të Chicago Fire, Hugo Cuypers, i cili ka 13 gola.
