Gerard Piqué e njeh shumë mirë ndjesinë e një finaleje Botërori. Në vitin 2010, ai ishte pjesë e Spanjës që ngriti Kupën e Botës në Afrikën e Jugut. Tani, 16 vite më vonë, ish-mbrojtësi katalanas sheh kombëtaren e Luis de la Fuente vetëm një hap larg yllit të dytë, në finalen e madhe ndaj Argjentinës.
Në një intervistë për AS, Piqué analizoi përballjen e madhe mes Spanjës dhe Argjentinës, duke e cilësuar këtë finale si një nga më të bukurat e mundshme.
“Spanja ishte mes favoriteve të mia, bashkë me Francën, Anglinë dhe Brazilin, jo aq shumë Argjentina. Por duke parë si shkoi turneu, kjo është një nga finalet më të mira që mund të shihnim”, u shpreh Piqué.
Sipas tij, kjo finale ka peshë historike për të dyja skuadrat. Për Spanjën, mund të jetë ylli i dytë në fanellë. Për Messin, mund të jetë Botërori i dytë radhazi, diçka që do ta forconte edhe më shumë statusin e tij si një nga më të mëdhenjtë e historisë.
“Për Leon do të ishte Botërori i dytë radhazi dhe do ta mbyllte në mënyrë perfekte karrierën e tij. Ndërsa për Lamine Yamal, nëse Spanja fiton, do të ishte diçka unike në moshën 19-vjeçare”, shtoi ai.
Piqué theksoi se, sipas tij, Spanja është skuadra më e fortë në aspektin kolektiv.
“Si skuadër, Spanja është më e mira. Jam i bindur se nëse është në finale, ashtu si Argjentina, është sepse e meriton”, deklaroi ish-mbrojtësi.
Duke folur për Messin, Piqué vlerësoi inteligjencën e ish-shokut të tij te Barcelona, duke thënë se argjentinasi di si të përshtatet me moshën dhe me momentet e lojës.
“Messi ka shumë cilësi, dhe një prej tyre është inteligjenca. Ai e di që fizikisht nuk është më 25 vjeç, por e di shumë mirë ku duhet të pozicionohet për të qenë i rrezikshëm. Talenti i tij është unik. Ai gjen gjithmonë zgjidhjen më të mirë”, tha Piqué.
Megjithatë, ai paralajmëroi se Argjentina nuk është vetëm Messi.
“Nuk ka rëndësi nëse vendos një, dy apo tre lojtarë për ta ndalur Messin, ai do të gjejë mënyrën për të dalë nga situata. Dhe nëse jo, vëmendja ndaj tij do t’u krijojë hapësira lojtarëve të tjerë. Argjentina nuk është vetëm Messi”, theksoi ai.
Për mënyrën se si Spanja duhet ta luajë finalen, Piqué ishte i qartë: skuadra duhet të jetë më besnike se kurrë ndaj stilit të saj.
“Për të fituar, duhet të jemi më radikalë se kurrë në stilin tonë. Spanja duhet të kontrollojë topin, të presojë lart dhe të mos ketë frikë. Nëse e bën këtë, do të ketë më shumë shanse për të fituar”, u shpreh kampioni i botës i vitit 2010.
Ish-mbrojtësi bëri gjithashtu krahasimin mes Spanjës së vitit 2010 dhe skuadrës aktuale të De la Fuente.
“Ato janë shumë të ngjashme. Shumë thonë se Spanja e vitit 2010 kishte më shumë aurë dhe karizëm, por kjo thuhet pas 16 vitesh. Kur shkuam në atë Botëror, sidomos pas humbjes ndaj Zvicrës, askush nuk na jepte si favoritë”, kujtoi ai.
Piqué vlerësoi edhe lojtarë si Pedri, Fabián Ruiz, Mikel Merino, Oyarzabal dhe mbrojtjen spanjolle, që ka pësuar vetëm një gol në gjithë turneun.
“Spanja luan futboll të jashtëzakonshëm, por kjo nuk do të thotë se duhet të shënosh katër apo pesë gola çdo ndeshje. Në vitin 2010 fituam pothuajse gjithmonë 1-0 dhe luajtëm shumë mirë”, tha ai.
Në fund, Piqué pranoi se ndodhet mes dy ndjesive: dëshirës që Spanja të fitojë dhe respektit e dashurisë për Messin.
“Shpresoj të fitojë Spanja, por nëse fiton Argjentina, do të jem i lumtur edhe për Messin”, përfundoi Gerard Piqué.
