Lionel Messi ka treguar edhe një herë madhështinë e tij, jo vetëm si futbollist, por edhe si njeri, pas përballjes dramatike mes Argjentinës dhe Cape Verde në Kupën e Botës 2026.
Menjëherë pas vërshëllimës së fundit, kapiteni argjentinas iu afrua portierit të Cape Verde, Vozinha, i cili kishte zhvilluar një paraqitje fantastike dhe ishte një nga protagonistët kryesorë të ndeshjes.
Vozinha zbuloi më pas fjalët që Messi i tha në atë moment emocional.
“Iu afrova, por para se të thosha diçka, ai më përqafoi dhe më tha: ‘Punë e mrekullueshme. Je një portier fantastik. Populli yt duhet të jetë krenar për ty’. Ta dëgjosh këtë nga Leo është diçka vërtet e pabesueshme”, u shpreh portieri.
Pavarësisht tensionit të madh të ndeshjes dhe emocioneve të forta pas eliminimit, Messi gjeti kohë për të vlerësuar kundërshtarin, duke dhuruar një moment të bukur respekti dhe sportiviteti.
Portieri i Cape Verde tregoi gjithashtu se i kërkoi Messit fanellën si kujtim nga kjo përballje e paharrueshme. Ylli argjentinas buzëqeshi dhe pranoi, duke i premtuar se do t’ia jepte në tunelin e stadiumit.
Ky moment u prit me shumë emocion, pasi tregoi anën më të bukur të futbollit: respektin mes kampionëve dhe vlerësimin për një lojtar që dha gjithçka në fushë.
