Rreth 100 zjarrfikës po përballen me një zjarr të madh në Aberdeen Place, Maida Vale, ku një transformator elektrik është përfshirë nga flakët.
Sipas Brigadës së Zjarrfikësve të Londrës, flakët janë përhapur edhe në çatinë e një ndërtese banimi aty pranë, raportoi Sky News.
Që nga ora 5:30 e mëngjesit të së martës, janë marrë mbi 170 telefonata urgjente në lidhje me incidentin. Pesëmbëdhjetë automjete zjarrfikëse janë angazhuar në përpjekjet për shuarjen e zjarrit.
Komandanti i stacionit, Paul Morgan, u bëri thirrje banorëve që të mbajnë dritaret dhe dyert e mbyllura dhe të shmangin zonën për sa kohë që situata mbetet e rrezikshme.
Zjarri po mbahet nën kontroll nga ekipe të ardhura nga Paddington, Euston dhe stacione të tjera përreth.
Shkaku i zjarrit ende nuk dihet dhe nuk ka pasur raportime për ndërprerje të energjisë elektrike në zonë.
Ky incident ndodh vetëm një muaj pasi një zjarr në një nënstacion elektrik çoi në mbylljen e përkohshme të aeroportit Heathrow.
