Moderatori dhe ish-banori i “Big Brother VIP”, Meriton Mjekiqi, dhe vëllai i tij janë shpallur në kërkim nga Policia e Kosovës, pasi dyshohet se janë përfshirë në një përplasje fizike me disa persona.
Sipas raportimeve nga mediat kosovare, gjatë incidentit është lënduar një 29-vjeçar, i cili ka pësuar plagë të rënda trupore. Ngjarja ka ndodhur disa ditë më parë, ndërsa autoritetet kanë ndërmarrë veprimet për të lokalizuar dhe arrestuar Mjekiqin dhe vëllain e tij, Rinorin.
Policia ka bastisur banesën e tyre në Obiliq, por të dy nuk janë gjetur në vendngjarje. Sipas raportimeve, bëhet me dije se Meritoni aktualisht ndodhet jashtë territorit të Kosovës dhe Shqipërisë.
Nga ana tjetër, burime pranë moderatorit kanë deklaruar se ai nuk ka qenë në dijeni për ndonjë procedurë hetimore apo urdhër arresti ndaj tij.
Hetimet janë ende në vazhdim dhe autoritetet nuk kanë dalë me një deklaratë zyrtare mbi versionin e tyre të ngjarjes. Deri më tani, mbeten të paqarta si rrethanat e incidentit, ashtu edhe roli i saktë i Mjekiqit në përplasjen fizike.
