*Imazh i gjeneruar nga AI (Inteligjenca Artificiale)
Një ngjarje e rëndë dhune në familje ka tronditur qytetin Megliadino San Fidenzio në Padova të Italisë. Një burrë 55-vjeçar me origjinë shqiptare është arrestuar nga autoritetet italiane, i akuzuar për tentativë vrasjeje ndaj bashkëshortes së tij 42-vjeçare.
Sipas raportimeve, burri ushtronte dhunë sistematike dhe kërcënime ndaj gruas prej vitesh. Ditën e fundit të sulmit, ai e kishte goditur atë me grushte dhe shqelma, e kishte kapur për fyti dhe e kishte përplasur përtokë. Gruaja kishte humbur ndjenjat, dhe burri, duke menduar se ajo kishte vdekur, e kishte mbështjellë trupin e saj me një qilim dhe e kishte tërhequr zvarrë deri në ballkon.
Në ato momente në banesë kishte mbërritur djali i çiftit, 22 vjeç, të cilit i ati i kishte thënë se nëna kishte ndërruar jetë dhe se kishte ndërmend të hidhej nga tarraca. Fqinjët, të shqetësuar nga zhurmat dhe të bërtiturat që shpesh dëgjoheshin nga shtëpia e tyre, kishin njoftuar menjëherë policinë dhe ambulancën.
Fatmirësisht, gruaja kishte mbijetuar dhe u dërgua në gjendje të rëndë në spitalin e Schiavonia-s. Edhe në prani të autoriteteve, burri tentoi ta sulmonte përsëri, por u ndalua nga policia.
Hetimet zbuluan një histori të zgjatur abuzimi: burri jo vetëm që ushtronte dhunë fizike dhe psikologjike, por i kishte ndërprerë gruas të gjitha marrëdhëniet shoqërore dhe e kishte izoluar nga jeta publike. Ai menaxhonte të ardhurat e familjes dhe i kishte mohuar gruas mundësinë për të investuar në sallonin e bukurisë ku ajo punonte.
Sipas dëshmisë së djalit, dhuna ndodhte shpesh para syve të tij. Gruaja është aktualisht në kujdes mjekësor dhe po merr mbështetje nga autoritetet për të rindërtuar jetën e saj.
Burri është arrestuar dhe përballet me akuza të rënda për tentativë vrasjeje dhe dhunë të vazhdueshme në familje.
