Mediat në Paraguay raportojnë se një klan shqiptar me ndikim të madh në trafikun e kokainës nga Amerika e Jugut në Evropë është shkatërruar muajin e kaluar, me arrestimin e 11 anëtarëve kryesorë në Shqipëri, Belgjikë dhe Republikën Dominikane.
Operacioni i suksesshëm nisi në gusht, nëpërmjet një hetimi të Prokurorisë së Posaçme Kundër Korrupsionit dhe Krimit të Organizuar. Kjo prokurori kërkoi 16 urdhër-arreste dhe kryerjen e bastisjeve në Elbasan dhe qytete të tjera, që rezultuan në arrestimin e dhjetë anëtarëve të klanit. Midis tyre, dy nga liderët e organizatës, Ervis dhe Ardian Çela, u ndaluan, ndërsa Franc Çopja, udhëheqësi kryesor, ishte arrestuar më herët në Dubai dhe po përballet me akuza për vrasje dhe krime të tjera në Belgjikë.
Më 3 shtator, Soni Pepa, një tjetër anëtar kyç, u kap në Punta Cana. Ai ishte përgjegjës për organizimin e dërgesave të më shumë se 11 ton kokainë në Antwerpen në nëntor të vitit 2020. Ai dhe të tjerët akuzohen për veprime penale si trafikimi i drogës, krijimi i një organizate kriminale dhe pastrimi i parave nga aktivitetet kriminale.
Ky grup kriminal është identifikuar si një nga më të fuqishmit në Evropë për trafikun ndërkombëtar të kokainës, me lidhje të forta në vendet e Amerikës së Jugut, veçanërisht Bolivi dhe Paraguay. Prokurorët nënvizojnë se klani Çopja-Çela kishte ndikim të drejtpërdrejt në çmimin e kokainës në tregjet evropiane, duke kontrolluar të gjithë zinxhirin e furnizimit.
Ngarkesat e kokainës bliheshin drejtpërdrejt nga prodhuesit bolivianë. Ervis Çela kishte jetuar në Paraguay për të mbikëqyrur ruajtjen dhe dërgimin e ngarkesave në Evropë, ku grupi merrej me shpërndarjen e drogës dhe pastrimin e parave. Kokaina fshihej në mënyrë të sofistikuar, kryesisht në kanaçe boje, duke përdorur simbole identifikimi si “Puma” ose “Lightning Eyes”.
Një dokument prej 282 faqesh i SPAK-ut përfshin emrin e biznesmenit paraguaian Diego Benítez, i cili konsiderohet si personi kryesor që lidhej me shqiptarët për organizimin e dërgesave dhe pastrimin e fitimeve të paligjshme.
