Partia Demokratike ka reaguar ndaj ceremonisë së organizuar nga Kryeministri Edi Rama, gjatë së cilës u ndanë medalje nderi për punonjësit e Zjarrfikësve, Forcat e Armatosura dhe ekipet e Emergjencave që u angazhuan në përballimin e zjarreve këtë verë.
Në një deklaratë për mediat, PD e cilësoi këtë ceremoni si “një tallje” me sakrificën reale të atyre që luftuan flakët, duke theksuar se medaljet e arit, argjendit apo bronzit nuk mund të zëvendësojnë mungesën e infrastrukturës, mjeteve, rrogave dhe trajtimit institucional.
“Ramaduro shpërndau medalje sikur të ishte një kampionat sportiv, ndërsa zjarrfikësit dhe ushtarakët përballen me flakët me degë pishash dhe lopata”, deklaron PD.
PD thekson se përkundër vlerësimit maksimal për përkushtimin e zjarrfikësve, kritikon ashpër qeverinë, të cilën e quan përgjegjëse për bilancin katastrofik të dëmeve, për shkak të mungesës së mjeteve dhe përgatitjes.
Sipas PD, Shqipëria ka pësuar 2-3 herë më shumë dëme nga zjarret, krahasuar me vendet e tjera të rajonit apo Europës.
Deklarata mbyllet me paralajmërimin se drejtësia nuk do të harrojë përgjegjësit për atë që PD e cilëson si “krim shtetëror” të djegies së pasurisë kombëtare.
