Lajme të mira për Hansi Flick dhe tifozët e Barcelonës: sulmuesi brazilian Raphinha është pranë rikthimit pas dëmtimit që e mbajti jashtë për gati dy muaj.
Sipas Mundo Deportivo, 28-vjeçari ka rifilluar stërvitjet individuale dhe pritet t’i bashkohet grupit në ditët e ardhshme. Nëse gjithçka shkon sipas planit, ai mund të jetë i gatshëm për ndeshjen ndaj Athletic Bilbao-s në javën e 13-të të La Ligës, më 22 nëntor, pas pushimit ndërkombëtar.
Raphinha u dëmtua në javën e gjashtë kundër Oviedo-s, më 25 shtator, duke u detyruar të largohej nga fusha në minutën e 65-të. Deri tani, ai ka zhvilluar 6 ndeshje, me 3 gola dhe 2 asistime për Barcelonën.
Ky rikthim vjen në një moment të rëndësishëm për Flick-un, që shpreson të rikthejë dinamizmin në krahët e sulmit pas mungesave të shumta.
