Lamine Yamal ka reaguar me një mesazh emocional pas lajmit se sezoni i tij me Barcelonën ka përfunduar para kohe për shkak të dëmtimit. Talenti spanjoll nuk e fshehu zhgënjimin, duke pranuar se ky është një nga momentet më të vështira për të, sidomos sepse vjen në një fazë vendimtare të sezonit.
18-vjeçari pësoi një dëmtim në hamstringun e majtë gjatë ndeshjes së fituar 1-0 ndaj Celta Vigos në La Liga, takim në të cilin kishte shënuar edhe golin vendimtar nga pika e bardhë. Barcelona konfirmoi më pas se ai do të mungojë për pjesën e mbetur të sezonit.
Përmes një postimi në Instagram, Yamal ndau ndjenjat e tij me tifozët. “Ky dëmtim më mban larg fushës pikërisht në momentin kur doja më shumë se kurrë të isha aty, dhe kjo më dhemb më shumë sesa mund ta shpjegoj. Më dhemb që nuk mund të luftoj përkrah shokëve të skuadrës dhe nuk mund ta ndihmoj ekipin kur ka nevojë për mua. Por unë besoj te ata dhe e di që do të japin gjithçka në çdo ndeshje”, shkroi ai.
Yamal premtoi se do të vazhdojë ta mbështesë Barcelonën edhe nga jashtë fushës. Ai theksoi se kjo nuk është fundi, por vetëm një ndalesë e përkohshme, duke premtuar rikthim më të fortë dhe më i motivuar se kurrë për sezonin e ardhshëm.
Mungesa e tij përbën një goditje të madhe për skuadrën e Hansi Flick, sidomos në prag të ndeshjeve vendimtare për titullin dhe El Clasicos ndaj Real Madridit. Ndërkohë, mbetet ende për t’u parë nëse Yamal do të arrijë të jetë plotësisht gati edhe për Kupën e Botës 2026.
