Shqipëria vijon të mbetet vitet e fundit atraktive, jo vetëm për turistët e shumtë, por njëkohësisht edhe për sipërmarrësit e huaj që investojnë në vendin tonë.
Vetëm gjatë vitit 2024, referuar shifrave zyrtare të Bankës Qendore, janë 1 miliardë e 584 milionë Euro investime të huaja direkte që u injektuan në ekonominë e vendit. Në raport me vitin 2023, këto investime pësuan rritje me 92 milionë Euro, sipas të dhënave të Bankës së Shqipërisë.
Vetëm në tremujorin e fundit të vitit 2024, ky institucion thekson se sipërmarrësit dhe kompanitë e huaja kanë investuar 423 milionë Euro në Shqipëri, ku pjesa dërrmuese ishte fitim i riinvestuar dhe më pak injektim i ri.
Sektori i pasurive të paluajtshme udhëheq investimet e huaja në vendin tonë ku vetëm gjatë vitit të shkuar u injektuan 379 milionë Euro në ekonomi. Fokusi i të huajve në këtë sektor janë blerja e banesave apo bizneseve, kryesisht në Tiranë, por edhe në zonat bregdetare.
Pas tregut të pronave, si sektor mjaft tërheqës për të huajt vjen industria nxjerrëse dhe ajo përpunuese, respektivisht me 214 milionë Euro dhe 173 milionë Euro investime.
Të ndarë sipas shteteve që investojnë më shumë në Shqipëri, Holanda zë vendin e parë në renditje për nga pesha e investimeve direkte, ndjekur nga Italia dhe Turqia.
