Kylian Mbappé ka folur pas humbjes së Real Madridit në derbin ndaj Atlético Madridit, duke pranuar se rezultati përbën një hap pas për skuadrën e José Mourinhos.
“Po, ishte një hap pas. Ishte shumë e vështirë, donim të fitonim dhe e dinim çfarë lloj ndeshjeje na priste. Skuadra dha gjithçka, por duhet të vazhdojmë përpara sepse sezoni është ende i gjatë”, deklaroi francezi për AS.
Mbappé nuk deshi të hynte shumë në polemikat për arbitrimin, pavarësisht episodeve të diskutueshme në derbi. “Nuk kam qenë kurrë një lojtar që flet shumë për arbitrat dhe nuk do të filloj tani. Kam mendimin tim, por e mbaj për vete. Arbitri është njeri dhe bën gabime, por nuk dua të hyj në këtë temë.”
Sulmuesi francez theksoi se reagimi duhet të vijë përmes punës: “Duhet të punojmë dhe të bëjmë më shumë. Të tjerët mund të flasin, por ne duhet të punojmë për t’ia rikthyer entuziazmin Real Madridit dhe për të rikthyer trofetë.”
Mbappé foli edhe për nisjen e epokës së Zinedine Zidane te Franca, duke e cilësuar historinë e tyre si diçka “si në film”. Zidane ishte ai që e kishte shoqëruar Mbappén në Valdebebas kur ishte vetëm 13 apo 14 vjeç, ndërsa tani do ta drejtojë në kombëtare.
Në fund, ai komentoi edhe garën për Topin e Artë: “Jam i qetë. Kam bërë gjithçka që mundesha dhe mendoj se kam bërë mirë. Tani presim.”
