Një vit më parë, “El Clásico” në “Santiago Bernabéu” ishte një pikë kthese për Kylian Mbappé — por në anën negative. Francezi u kap në pozicion jashtë loje plot tetë herë në atë ndeshje, duke rënë vazhdimisht në “kurthin” e linjës së lartë mbrojtëse të Hansi Flick. Të dy golat që shënoi atë ditë u anuluan për offside: një në mënyrë të qartë dhe tjetri për disa centimetra, pas një pritjeje të gjatë të VAR-it.
Në atë sezon, Mbappé nuk arriti më kurrë një shifër të tillë të lartë. Ndeshja me më shumë pozicione jashtë loje pas asaj kundër Barcelonës ishte ajo ndaj Valencias — me katër offside, gjysmën e asaj që kishte pësuar në “Clásico”. Ai e mbylli sezonin me një mesatare prej 0.93 offside për ndeshje, me synimin e qartë për ta përmirësuar këtë aspekt.
Në fillim të këtij sezoni, megjithatë, historia gati u përsërit. Në sfidën ndaj Mallorcës, e vetmja ku nuk kishte shënuar deri në përplasjen e fundit kundër Juventusit, Mbappé u kap tre herë në pozicion jashtë loje dhe i’u anuluan dy gola — njëri sërish për centimetra, një déjà-vu e atij “El Clásico”-je të parë.
Trajneri Xabi Alonso e komentoi qetësisht situatën:
“Kjo mund të përmirësohet. Nuk më shqetëson që nuk shënoi — ai pati disa raste, por ishte jashtë loje për pak. Pozicionet jashtë loje mund të trajnohen; janë gjëra që përmirësohen.”
Dhe përmirësimi tashmë është i dukshëm. Në këtë sezon, Mbappé ka një mesatare të ngjashme prej 0.92 offside për ndeshje, por pas ndeshjes kundër Mallorcës, kjo shifër ka rënë në 0.78 – vetëm shtatë herë nëntë ndeshje. Në përballjen me Villarreal, një skuadër që mbron lart si Barça, ai nuk u kap asnjëherë jashtë loje.
Tani, i vendosur dhe në formë të shkëlqyer me 15 gola në 12 ndeshje, Mbappé vjen në “El Clásico” të së dielës si një version më i pjekur, më i kujdesshëm dhe më i rrezikshëm – gati për të mos rënë më në “kurthin e Flick”.
