Kylian Mbappé ka hyrë zyrtarisht në historinë e Francës. Sulmuesi i Real Madrid u bë golashënuesi më i mirë i të gjitha kohërave me kombëtaren franceze, pas dy golave të shënuar në fitoren 3-1 ndaj Senegalit në ndeshjen hapëse të Botërorit 2026.
Me këtë dopietë, Mbappé arriti në kuotën e 58 golave me Francën, duke kaluar rekordin e Olivier Giroud. Një arritje e jashtëzakonshme për kapitenin francez, i cili është vetëm 27 vjeç dhe vazhdon të thyejë rekorde në skenën më të madhe.
Pas ndeshjes, shokët e skuadrës i dhuruan një fanellë speciale me numrin 58, për të festuar momentin historik.
Mbappé reagoi edhe në rrjetet sociale, ku shprehu krenarinë e tij për këtë arritje.
“58 gola. Një krenari e madhe që bëhem golashënuesi më i mirë në historinë e kombëtares sonë, një vend që ka pasur kaq shumë lojtarë të mëdhenj. Faleminderit të gjithë shokëve të skuadrës, stafit dhe Federatës Franceze për besimin që nga dita e parë. Dhe faleminderit juve për mbështetjen. Vazhdojmë, ka ende shumë për të bërë…”, shkroi Mbappé.
Por rekordi me Francën nuk është objektivi i vetëm. Mbappé tashmë ka 14 gola në Kupën e Botës dhe po i afrohet rekordit historik të turneut, që mbahet nga Lionel Messi dhe Miroslav Klose me nga 16 gola.
Me formën që po kalon dhe moshën ende në favor, ylli francez duket gjithnjë e më pranë një tjetër momenti historik.
Franca do të rikthehet në fushë të hënën, ku do të përballet me Irakun në ndeshjen e dytë të grupit, përpara se të mbyllë fazën e parë ndaj Norvegjisë.
