Didier Deschamps do të drejtojë ndeshjen e tij të fundit në krye të Francës këtë të shtunë, në sfidën për vendin e tretë ndaj Anglisë.
Pas humbjes 2-0 kundër Spanjës në gjysmëfinalen e Kupës së Botës, “Gjelat” nuk arritën të siguronin finalen e madhe ndaj Argjentinës. Tani, Franca do të kërkojë medaljen e bronztë përballë Anglisë në Miami, në një ndeshje që do të shënojë edhe fundin e epokës Deschamps.
Në prag të kësaj sfide, Kylian Mbappé ka tërhequr vëmendjen me një mesazh emocionues për trajnerin e tij. Kapiteni francez pranoi zhgënjimin për eliminimin dhe theksoi se skuadra duhet t’i kishte dhënë Deschamps një fund më të mirë pas 14 viteve në krye të kombëtares.
“Sot është vallëzimi yt i fundit. Ti na ke dhënë kaq shumë. Duhet të të kishim ofruar një fund më të bukur, por dështuam”, shkroi Mbappé.
Ylli francez vlerësoi kontributin e madh të Deschamps në ringritjen e Francës, duke theksuar se rëndësia e tij nuk është vlerësuar gjithmonë siç duhet.
“Është shumë e vështirë të përshkruash me fjalë atë që ke dhënë për 14 vite. Ke qenë një figurë kyçe në rilindjen e kësaj skuadre. Njerëzit nuk e kanë vlerësuar gjithmonë madhështinë tënde, por koha dhe historia do ta bëjnë këtë”, shtoi ai.
Mbappé e mbylli mesazhin duke falënderuar trajnerin për mundësinë që i dha për të përfaqësuar Francën në skenën më të madhe të futbollit.
“Ndihem i privilegjuar që kam qenë pranë një prej legjendave më të mëdha të vendit tonë. Kam vetëm kujtime të mrekullueshme nga gjithçka që kemi përjetuar dhe arritur së bashku. Të uroj më të mirat në aventurën tënde të re dhe faleminderit edhe një herë për gjithçka që i ke dhënë kësaj fanelle që do të thotë kaq shumë për ne.”
Ndeshja ndaj Anglisë do të jetë mbyllja e një kapitulli historik për Deschamps, i cili largohet nga Franca pas një periudhe të gjatë në krye të kombëtares.
