Marco Materazzi, kampion bote në vitin 2006, ka komentuar shortin e zhvilluar në Washington, duke theksuar se Italia ka rënë në grupin më të lehtë të mundshëm – por paralajmëron se ende nuk ka asgjë të sigurt, pasi Azzurrët duhet më parë të kalojnë fazën “play-off”.
“Jemi shortuar në grupin më të lehtë. Por më parë duhet të shkojmë në Kupën e Botës,” tha ish-mbrojtësi, duke kujtuar diferencën mes Italisë kampione të 2006-ës dhe asaj të sotme: dy Botërorë të humbur, shumë keqardhje dhe ende pasiguri për kualifikimin në SHBA, Kanada dhe Meksikë. “Na ndajnë dy ndeshje nga Botërori dhe duhet t’i fitojmë të dyja.”
Kë kundërshtar e sheh më të vështirin në Grupin B?
“Kanadanë, sepse do të luajë në shtëpi. Është gjithmonë e vështirë të përballesh me një përfaqësuese pritëse. Por duhet pasur kujdes edhe me Katarin… do të jenë të motivuar të përfaqësojnë vendin e tyre.”
Për Zvicrën, që eliminoi Italinë në Europianin e fundit, Materazzi shprehet:
“Luan futboll të mirë, por mund të ishte edhe më keq. Është një nga kundërshtarët më të ‘butë’ në Europë. Ky short, në fakt, nuk ishte i keq.”
Çfarë duhet për të kaluar play-off-in?
“Të mbetemi të bashkuar. Asgjë nuk duhet marrë si e mirëqenë. Futbollistët duhet të japin maksimumin dhe të luajnë pa frikë. E pamë me Maqedoninë — detajet e vogla kushtojnë shumë.”
Mbrojtja apo sulmi?
“Grupi është çelësi. Vetëm të qëndrojnë të bashkuar dhe të japin më të mirën.”
Për Gennaro Gattuson:
“Si trajner, gjithmonë u jep skuadrave lojë. Karakterin e tij e dimë të gjithë. Shpresoj të jetë njeriu i duhur që na çon në Botëror. Do të ishte fantastike për të dhe për gjithë Italinë. Nëse nuk shkojmë, nuk do të jetë faji i tij.”
Mesazhi i Materazzit për lojtarët e Italisë:
“Të luajnë pa frikë dhe të sulmojnë që në fillim. Sfida të tilla duhen fituar menjëherë. Nuk duhet të përsërisim gabimin ndaj Maqedonisë, kur pësuam në minutën e 90-të.”
Çfarë do të thotë nëse Italia nuk kualifikohet?
“Do të ishte dështim për futbollin italian dhe për sistemin. Nëse mungojmë për herë të tretë radhazi, dikush duhet të ngrihet dhe të thotë: ‘Më falni, unë largohem, nuk jam i aftë’.”
Kujtimi nga Italia e 2006-ës:
“Ai grup mendonte vetëm të ishte i bashkuar, ndeshje pas ndeshjeje. Ishim miq, na pëlqente të punonim bashkë dhe kishim shumë cilësi.”
