Gjykata e Apelit në Greqi ka konfirmuar burgimin e përjetshëm për 44-vjeçarin me origjinë shqiptare, Florand Shehu i cili në korrik të vitit 2021 vrau me gjakftohtësi bashkëshorten e tij 31-vjeçare, Anisa, në banesën e tyre në zonën e Dafinës në Athinë.
Burri u shpall fajtor unanimisht për akuzat e vrasjes me paramendim në gjendje të qetë shpirtërore, si dhe për mbajtje dhe përdorim armësh, pa iu njohur asnjë rrethanë lehtësuese nga trupi gjykues.
Ngjarja e rëndë ndodhi më 30 korrik 2021, kur autori e goditi gruan me një thikë 28 cm në zonën e qafës, duke i shkaktuar vdekjen. Sipas ekspertizës mjeko-ligjore, nuk kishte shenja rezistence, çka tregon se viktima mund të ketë qenë shtrirë në shtrat dhe e papërgatitur për sulmin.
Çifti kishte një djalë të vogël dhe jetonte në lagjen Haravgi të Dafinës, ku autori kishte një biznes të vogël, një fast-food në sheshin kryesor të zonës. Sipas deklarimeve të fqinjëve për mediat greke, marrëdhënia mes çiftit ishte konfliktuale, me debate të vazhdueshme dhe xhelozi të theksuar nga ana e burrit. Shpesh dëgjoheshin thirrje për ndihmë nga apartamenti i tyre.
Avokati i familjes së viktimës, Ioannis Glykas, u shpreh se gjatë seancës gjyqësore, i akuzuari tentoi të justifikonte veprën, duke ngritur pretendime të pabazuara për një lidhje jashtëmartesore të bashkëshortes, të cilat nuk u provuan kurrë dhe u refuzuan nga gjykata.
“Sjellja e tij u konsiderua krejtësisht e papranueshme dhe gjykata nuk i njohu asnjë rrethanë lehtësuese”, deklaroi avokati.
Në përfundim të deklaratës, Glykas shtoi:
“Ky vendim nuk e rikthen dot jetën e humbur, por përbën një mesazh të qartë drejtësie dhe besimi në shtetin ligjor.”
